Rapazis!
Tremura toma na mi. N ka sabe sê gripi ô si ka linpu ka kanba na mi. Kudadu da-n própi.
Guentis antigo dja flába mé: "pâpia na kuza runhu, kuza apareci".
Nton é ka si, ki góssi li, mi ku gripi dja toma-n na kurva, ki kabessa ka sta dâ pa mas nada, nen kel meiu kuartu, ku limon, ku ádju, ku mel quenti di bedjera inda ka kura-n.
Nton é ka si, ki li na nha saleta di konputador, na pó di planta ki N têni na vazu, kel kuza runhu li parse-n nha dianti roladu rostu pa mi, ku gána leba-n kóba kráki.
Eh..eh..eh... kredu inkruz bataréru, fitisseru infernadu longi-l mi, miassa N dábu ku águ fedegóza, djobe-n N fazê-bu fisga kanhota pa bu bá bordolega la fundu mar.
Eh Nhu Sã Djon da Madera. Nhu dan sinza di bosta karneru, da-n fumu di erva xeróza, da-n lansa di Nhu Sâ Jorgi kavaleru, da-n barapó di Nhu Sã Djon da Ajuda, pa-n sôta xúxu d'infernu ki dja kanba-n dentu nha kaza.
Fitisseru, disgrassiadu! Fisga kanhóta, tróska maróska, mal lobadu é na fundon d'infernu, anus e anus sen fim. Dexa-n nha kaza, dexa-n nha spritu sussegadu.
N kába di blasfêmia kuza kapri kai na vazu. N rabida N djôbe, N átxa un kuza ki pârse rabu largatixa, rassekadu cinza ta báza.
Sem comentários:
Enviar um comentário