quarta-feira, 27 de fevereiro de 2008

Post pa Terra-Longi



Ess puezia ta bai pa tudu fidjus di terra ki sta longi kada un na si afazer.
Ta trabadja ta studa ó ta vivi. Anós alanu li ta manti ku ilhas, ku txuba ó sen txuba.
Basta Sol manxe tudu dia vida nu striba ku el ti ki dâ.
Basta ser ki ali kau ta bá ta konpo divagar-divagar.
Kuzas sta pa kaminhu.
Dja-n flâ kantu bez ma anu 8 li é paridera.
Oitu é sinal di dôs obu confinadu na sis transu.
Demu, ta djângua.
Nhos manti fixi.
PUEZIA NA TABERNA


É li própi k’é terra-terra
Bon legrêti di amizadi
Undi ki tudu fidju-l terra
Podi palestra y xinti sábi

Linpu, pintadu ó vélha
Na kopu kualker un dês
Pa piritiva di mé di vera
Un bu báfa, dôs… ti três

É li própi k’é terra-terra
Kau di matxu y di fémia
Ka ten fita ka ten pinera
Toma di bó sen blasfêmia

Nhos tudu fépu é amigu
Xintadu ó na pé di balkon
Toma pága sai sen inguísu
Dâ fiadu ki fali Nhu Djon

É li propi k’é terra-terra
Kau sta ku poku dinheru
Kantu diskansa kabessa
Konpo korpu anu interu
(Kaká Barboza)

2 comentários:

Cristina disse...

Nta lê kel poema li di vez em quando, como um spécie di incitassón pa n xinta pa n pensa na CV....
sodadi terra é txeu, ki nos ki sta longi ta djobi cuza di pega, um memória sabi, um música tristi, ou um poema moda keli, pa nu xinti mas pertu la

Cristina disse...

Realmenti ngosta txeu di poesia, e nta admira bu forma di screvi, kes d meu é bastante simples, ainda n tem txeu k prendi e trabadjas.
Felicidades pa la també.
Bjs

Textos Exilados

POEMAS DA COLETÂNEA - TERRA DILECTA  - CAMINHOS CANTANTES -  NÃO PUBLICADOS 1 Julho de remotos Julhos. Cíclicos Julho...