Depôs de konsulta médika konsta k’un tava mute doente e un tive de ser internode na ospital. Dezenganode pa dotôr, nha família ka kria ke un sobesse ke n’tava ta bá morre. Tude nhas amigos já sabia. Menos mi. E tude gente ke un tava perguntá se un tava ta bá morre, ex tava dezê kma nãu, ke mi era forte e un tava kuaje ta bába pa kaza.
Depôs de tónte recebê vizita, un deskonfia ke algun koza tava mariode. Nton un pedix flor. Pa trazia mi flor. Flor brónk se era pa bá pa kaza, marel se fosse pa fka más un tenpe na ospital e burmedje se un tivesse en extado grave, e se un tava nax última pa ka trazeba nada. Lá kada un garanti kex tava asseita ideia e ex tava kunpri.
Dia seginte, un pessoa entra na kuarto el pô un bukê de flor burmedje murtxe e sen vida na nha lóde. Komo un tava ta durmi un ka tma fé. Nesse meio tenpo un kordâ e na nha bera xtava un bukê de flor trazide pa un pessoa ke ningen oia ta entra, nen ta saí e nen nome el ka txá na lugar ninhun de ospital. Ora de kontrolo tinha txegóde. Enfermeira de serviso tinha un kara xpantóde ta oiá pa min. E mi lá tude muk ke nha flor brasode. Un vra un pergunta-l se tude tava drete ma el. El baralha, el bá pa trame tenperatura, el faze un sorrizo moda reste de kmida de góte, friu-friu. Vra sin el grita moda se el tava diante dun morte. E mi tude lá xarutin. Oi kaskode na el. Un tinha morride diazá na munde.
18.11.12 - KBarboza
Sem comentários:
Enviar um comentário