Finata 19
Stadu ton di seka y na rafugu di rizistensia
Soris kaídu azágua speradu sonhu perdedu
Na kontra ton anu sen konta nos insistensia.
Fomiadu forsadu kaminhu sul fidjus moredu
N'alma lamentadu di tera-mai nos izistensia
Gana-l sai y gana-l fika na intentu mordedu
Ki fundianu fé na petu y ki fundinu speransa
Na no'sprítu kriolu na bandera nos kudansa.
Finata 20
Txuba é spiga-flor na ligria-l nos speransa
Bib'alma na sonbra-l konfortu sen si mágua.
É son d'inxada na txon podu ki ka ta kansa.
Odju seku d'Otubru gran é kudar d'azágua.
Si abertu séu di txuba é simenti na bonansa
Así perdedu é plantas na dor di ka ten água
Jeografia di tenpu é odju txobedu na fodjada
Si, Sael sopradu é kastigu-l tenpu na morada.
(Do Livro Konfison na Finata)
Sem comentários:
Enviar um comentário